“Acara Papisahan Jo Pentas Seni Mahasiwa KKN UNP Nagari Batipuah Ateh 2023 Dibukak Jo Tari Pasambahan”
HARIANHALUAN.id – Tari Pasambahan adolah tarian selamaik datang dibaok an jo gerakan nan anggun jo lamah gamulai. Gerak an Tarian menunjuak an hati nan barasiah sarato niaik tulus dari tuan rumah dalam manyambuik tamu nan datang pado sabuah alek.
Dahulu Tarian Pasambahan ko labiah diutamokan untuak manyambuik tamu kerajaan, atau upacara adaik yang sipaiknyo resmi istilah urang kini, sarupo batagak pangulu misalnyo.
Namun untuak saat kini, tari pasambahan ditampie kan indak hanyo untuak panyambuik tamu dalam acara resmi sajo, malainkan bisa juo manjadi sarana hiburan bagi masyarakaik banyak nan diperagokan di babagai acara, sarupo pentas seni, pertunjukan budaya jo lain sabagainyo.
Salam Redaksi! Pembaca Haluan yang Budiman. Redaksi Haluan kembali menyajikan kanal baru khusus berbahasa Minang. Kanal ini diharapkan bisa memenuhi kebutuhan informasi pembaca, baik yang di ranah maupun di rantau. Redaksi Haluan juga menerima tulisan artikel berbahasa Minang dengan mengirimkan ke email: redaksihaluan.id@gmail.com dan WhatsApp: 081277901410. Terima Kasih
Naiak pangguang jo alaik musik saadonyo, anggota Sanggar Seni Barito Awan Subarang, sukses mamariahkan acara pentas seni dalam rangka papisahan mahasiswa Kuliah Kerja Nyata (KKN) Universitas Negeri Padang (UNP) pado hari itu, Selasa tanggal 19 Juli 2023 batampek di Medan Nan Bapaneh Batipuah di balakang Kantuea Wali Nagari Batipuah Ateh.
Mangawali acara, dibukak jo panampilan tari pasambahan nan dibaok an dek mahasiswa KKN nan diiriangi jo musik tradisional nan dimainan dek anggota Sanggar Barito Awan Subarang.
Katiko carano nan barisi siriah jo pinang di baso an ka pado Sekretaris Camaik Batipuah, wali Nagari basarato rombongan undangan nan duduak di muko, suaro bansi pun mangalun manandoan panghormatan kapado tamu undangan nan alah hadir.
Ganok sabulan manjalani KKN di Nagari Batipuah Ateh, kini tibo masonyo bagi mahasiwa KKN ko untuak manyudahi maso babaue jo masyarakaik. Sabagai tando bahaso kegiatan KKN alah usai mako diadoanlah acara nan sarupo iko supayo bakasan di masyarakaik pado umumnyo, pun juo baitu untuak mahasiswa KKN tarutamo.
Acara ko dihadiri dek banyak kalangan mulai dari Sekretaris Camaik Batipuah, Wali Nagari Batipuah Ateh, parangkaik nagari, kapalo Joroang, Ketua Forum Kemitraan Polri dan Masyarakaik (FKPM), Guru SD, ketua Pemuda, murid SD, Mahasiswa KKN UNP Gunuang Rajo, Mahasiswa KKN UNP Pincuran Tujuah, jo lapisan masyarakaik lainnyo.
Dalam kato sambutan nyo Ketua Mahasiswa KKN manyampaikan ucapan tarimo kasih kapado sagalo lapisan masyarakaik Nagari Batipuah Ateh nan alah manarimo jo sanang hati kadatangannyo di nagari ko.
“Kami juo mohon maaf dari lubuak hati nan paliang dalam jikok salamo barado di nagari ko banyak kato, sipaik atau perbuatan kami nan indak patuik jo indak sasuai jo tatanan kehidupan masyarakaik sekitar, mako sakali lai kami mohon maaf,” katua Ketua Mahasiswa KKN saat acara perpisahan tu.
Manjawek tantang nan disampaian Ketua Mahasiswa KKN, Wali Nagari Batipuah Ateh Ade Putra, S.E.,NL.P pun juo mamintak maaf kapado seluruh mahasiswa KKN apobilo salamo barado di siko indak baitu taparatian. Namun baliau bapasan supayo mahasiswa KKN ko bisa maambiak palajaran salamo babaue jo masyarakaik.
“Patamo sakali tarimo kasih atas ide-ide jo gagasan nan dibaok semoga bisa digunokan untuak mendukung kamajuan nagari di maso nan akan datang. Jadikanlah hal-hal nan di tamui salamo babaue jo masyarakaik sabagai sabuah pambalajaran dimano pambalajaran yang sarupo iko alun tantu akan ditamui di dalam bangku pakuliahan. Masyarakaik Nagari Batipuah Ateh terdiri dari baragam suku, baragam usia, baragam latar belakang pendidikan mako caro masuak untuak basosialisasi jo masyrakaik pun baragam pulo” kato Baliau.
Mampatageh wejangan nan disampaikan wali Nagari, Sekretaris Camaik Batipuah Baharudin,S.Pd.,M.Pd pun mambari pasan nan samo untuak mahasiswa KKN.
Manuruik baliau, samanjak zaman dahulu,UNP terkenal sabagai kampus nan alah banyak malahiakan urang – urang nan sukses. Mako kapado mahasiswa KKN sadapek mungkin mampu maikuti jejak pendahulunyo dimano setelah tamat kuliah akan mampu mambukak lapangan karajo bagi masyarakaik.
“Salain itu di Batipuah ko, tarutamo Batipuah Ateh terkenal jo adaiknyo nan sangaik kental. Masyarakaik nyo disabuik homogen bisa, disabuik heterogen bisa. Jadi harus ba pandai – pandai dalam bakomunikasi jo masyarakaik,” Pasan Walinagari saat itu.
Acara iko tadiri dari acara formal dan non formal. Untuak acara formal ditutuik jo prosesi panyarahan kenang-kenangan dari mahasiswa KKN untuak Wali Nagari Batipuah Ateh jo poto basamo. Kamudian acara non formal (hiburan) pun diawali jo panampilan tari indang nan dibaok an dek murid SDN 15 Batipuah Ateh.
Indak lupo sabagai paminum aie, panitia acara nan indak lain adolah mahasiwa KKN, mamiliah untuak manyuguahkan salah ciek dari makanan khas masyarakaik Batipuah nan banamo ” Lamang Kujuik “nan dimakan basamo jo pisang gadang. (*)