“Manjago Taradisi, Masyarakaik Nagari Batipuah Ateh Rutin Bazanji Satiok Manigo Malam Kamatian”
HARIANHALUAN.id – Tradisi biasonyo dipahami sabagai kabiasaan nan tumbuah dan bakambang di tangah masyarakaik nan taruih dijago dan diwarihkan sacaro turun – tamurun, baiak sacaro lisan ataupun tulisan. Nan babedo, antaro ciek daerah jo daerah lainnyo.
Sabagai bagian dari masyarakaik minang kabau, nan manjunjuang tinggi falsafah “Adaik Basandi Sarak, Sarak Basandi Kitabullah,” ado banyak kaharmonisan nan tajalin antaro adaik jo agamo.
Di Nagari Batipuah Ateh, Kacamatan Batipuah di Kabupaten Tanah Data, ado ciek tradisi nan sampai kini masih dijago dek masyarakaik yaitu tradisi bazanji.
Salam Redaksi! Pembaca Haluan yang Budiman. Redaksi Haluan kembali menyajikan kanal baru khusus berbahasa Minang. Kanal ini diharapkan bisa memenuhi kebutuhan informasi pembaca, baik yang di ranah maupun di rantau. Redaksi Haluan juga menerima tulisan artikel berbahasa Minang dengan mengirimkan ke email: redaksihaluan.id@gmail.com dan WhatsApp: 081277901410. Terima Kasih
Tradisi ko biasonyo dilaksanakan dalam upacara – upacara adaik jo agamo sarupo: mauluik nabi, mandoa kalahiran anak, akikah, khitanan, kamatian dan lain sabagai nyo. Bazanji adolah bacaan puja – pujian nan barisi riwayaik pajalanan hiduik Nabi Muhammad SAW.
Tantang bazanji ko, ado kebiasaan unik yang dipabuek dek masyarakaik Batipuah khususnyo Batipuah Ateh nan indak ado di pabuek di daerah lain. Katiko ado kamalangan atau kamatian nan sipaik panyampaian kaba nyo sacaro bahambauan, mako katiko ado kaluarga nan ditimpo kamalangan/ kamatian mako sanak famili jo masyarakaik sekaliliang akan sacaro suko rela datang untuak manjanguak sakaligus maigiah sumangaik pado kaluarga nan ditingga an si almarhum.
Sasudah ritual panyalanggaraan mayik, hinggo mayik alah dikubuean, mako pado malam harinyo akan diadokan kagiatan mangaji basamo di rumah si pangka sacaro baturuik – turuik salamo 3 hari. Pado malam ka tigo ikolah diadokan kagiatan barzanji. Dimuloi jo pasambahan malafa an niaik dari pangka ka urang siak, kamudian disambuang jo alunan barzanji (biasonyo dalam keadaan tagak dan tangan di pangku di tantang dado), dilanjuik an jo bakhatam, bazikie dan ditutuik jo doa.
Sairiang jo pakambangan zaman nan sangaik pesat, karano indak di imbangi jo kabijaksanaan dalam bapikie mako ado babarapo nilai adaik jo taradisi nan alah bageser digaruih dek kamajuan teknologi di tangah masyarakaik minang kini. Namun samanjak program ba baliak ka nagari digauangan mako timbue kambali kainginan untuak mampalajari nilai – nilai taradisi nan alah hampie hilang.
Untuang nyo, di Nagari Batipuah Ateh taradisi nan takah barzanji, pasambahan kato, seni anak nagari jo nan samacam nyo masih lestari di nagari ko. Mudah – mudahan untuak ka mungkonyo samakin banyak juo anak mudo nan baminaik untuak mampalajari sakaligus malestarian taradisi ko. Sahinggo masih bisa diwarihan sampai ka generasi nan ka datang. (*)