“Ado Pamutiahan Pajak Kandaraan Bamotor, Masyarakaik Nagari Batipuah Ateh Dihimbau Untuak Manggunoan Kasampatan”
HARIANHALUAN.id – Malalui Kaputusan Gubernur Sumatera Barat Nomor: 903-608-2023 Tentang Pembebasan Pokok Pajak Kendaraan Bermotor, Bea Balik Nama, dan Sanksi Administrasi, Pamarintah Provinsi Sumatera Barat mambuek kabijakan untuak mambari karinganan bagi masyarakaik nan punyo kandaraan bamotor (roda 2 atau labiah) dalam hal pambayaran pajak.
Pamutiahan pajak adolah program panghapusan atau pangampunan dando pajak nan dibabanan pado urang nan punyo kandaraan. Harapannyo, program ko bisa manertib an wajib pajak nan manunggak pambayaran pajak kandaraannyo. Gadangnyo nilai pajak kandaraan nan harus dibayie ba variasi tagantuang pado jenis, tahun, sarato, jumlah kapamilikan kandaraannyo.
Labiah lanjuik, pamilik kandaraan akan dikanakan sanksi atau hukuman sarato dando jiko indak mambayie pajak sasuai bateh wakatu nan ditantuan. Biasonyo dando nan ditangguang bukan dalam jumlah nan saketek dan lumayan mambabani pamilik kendaraan. Makonyo diadoan pamutiahan pajak ko.
Namun, nasyarakaik dimintak untuak indak salah paham takaik pamutiahan pajak ko. Pangaratian nan tapek adolah masyarakaik tatap mambayie pajak kandaraan, namun indak sapanuahnyo atau dikurangi, mandapek diskon istilah keren nyo.
Untuak itu, Pamarintah Nagari Batipuah Ateh maimbau kapado saluruah lapisan masyarakaik nagari nan punyo kandaraan untuak mampanggunoan kasampatan ko untuak malunasi pajak, baiak nan tahutang ataupun nan manunggak, Supayo nyaman untuak baraktifitas dan manggunoan kandaraan masiang-masiang dimano pun barado. (*)