“Fenomena Pamainan Slot Online di Tangah-Tangah Kahidupan Masyarakaik”
HARIANHALUAN.id – Babarapo tahun balakangan, banyak kalangan dari masyarakaik kito mulai dari generasi mudo sampai ka nan tuo, alah tapapar bahkan alah kacanduan dalam hal mamainkan pamainan slot babasis aplikasi online.
Pamainan slot online nan paliang banyak digandrungi/diminati salah satu nyo adolah pamainan nan identik jo kato-kato “Kakek Merah, Big Win, Mega Win, Super Win, jo Jack Pot” sebagai ciri khas nyo. Pamainan ko bisa sacaro bebas di unduh dek pamakai Hp Android atau samacamnyo, bisa dimainkan surang diri atau pun samo-samo bamain jo kawan sapagurauan.
Salam Redaksi! Pembaca Haluan yang Budiman. Redaksi Haluan kembali menyajikan kanal baru khusus berbahasa Minang. Kanal ini diharapkan bisa memenuhi kebutuhan informasi pembaca, baik yang di ranah maupun di rantau. Redaksi Haluan juga menerima tulisan artikel berbahasa Minang dengan mengirimkan ke email: redaksihaluan.id@gmail.com dan WhatsApp: 08116647705 // 081277901410. Terima Kasih
Samanjak maraknyo pamainan ko, ado babarapo pageseran nilai nan tampak dari kasaharian masyarakaik, khususnyo kalangan nan biaso duduak bagurau di lapau-lapau. Nan biasonyo ota di lapau saputaran domino, koa, jo lain sabagainyo, kini labiah condong ka pakaro “sidakah” (Istilah lain nan identik jo pamainan slot ko). Urang nan biasonyo indak bisa basidakah, sajak marak nyo pamainan ko jadi lumayan acok basidakah, tapi sidakah nyo barupo chip nan bisa dijadian modal untuk bisa mamainkan pamainan ko.
Nan biasonyo lapau heboh dek langkang domino, kini heboh dek dariang pitih koin dalam aplikasi katiko mandapek big win, mega win, hinggo super win. Kalau “Kakek Merah” alah galak, talabiah katiko kaleang jackpot alah pacah mako pacahlah suasana, samantaro Kawan nan lain alah basirabuik mamintak sidakah.
Kalau sakadar untuak hiburan, tantu indak masalah untuak mamainkan pamainan online ko. Namun katiko alah mancandu apo lai alah manjururuih ka arah pajudian tantu pakaro ko paralu manjadi paratian.
Sabagaimano dikatahui, aktivitas judi adolah salah satu pabuatan manyimpang nan manyalahi nilai jo norma nan ado dalam masyarakaik. Judi ko badampak buruak bagi pribadi atau bahkan kalompok masyarakaik.
Paralu di ingaik bahaso selain melanggar norma hukum dan nilai-nilai sosial nan balaku, judi online berdampak buruak yang bisa menyeret urang untuak batindak jaek. Secaro indak sadar pajudian manyebabkan bermacam pamasalahan sosial dan katagantungan untuak ingin teruih manaruih mancubo, sahinggo malupo an kawajiban dan tangguang jawabnyo dalam kahidupan pribadi maupun dalam bamasyarakaik.
Bagi palaku nan kalah bajudi akan manimbulkan raso panasaran dan ingin mancubo baliak hinggo mangakibatkan hutang dan kamiskinaan yang mamicu meningkeknyo angko kriminalitas.
Untuak itu saganok unsur Pamarintahan Nagari Batipuah Ateh mahimbau kapado masyarakaik nagari untuak bijak dalam mampaguno an alat komunikasi dan teknologi. Jan sampai kateledoran surang urang nan kacanduan judi online akan badampak kapado kaluarga dan masyarakaik sekitarnyo. (*)