“Bajak Kabau, Salah Satu Kaarifan Lokal Nagari Batipuah Ateh Nan Patuik Dipatahanan”
HARIANHALUAN.id – Sajak jaman daulu Indonesia dikenal sabagai negara agraris. Masyarakaiknyo mayoritas bamato pancaharian sabagai patani, baiak sabagai patani sawah maupun sabagai patani bakabun.
Untuak manggarap sawah jo ladang nan dimiliki dibantu dek tanago taranak kabau atau jawi.
Walaupun kini alah jaman modern, di Nagari Batipuah Ateh, Kabupaten Tanah Datar sandiri masih ado ciek jo duo patani nan mambajak lahannyo sacaro tradisional manggunoan tanago taranak.
Patani di Nagari Batipuah Ateh alah banyak juo nan manggunoan masin traktor (kabau japang), tapi kanyataannyo mambajak sawah manggunoan tanago kabau mampunyoi babarapo kalabiahan dari pado manggunoan masin bajak. Diantaronyo mampatahanan lingkuangan supayo taruih lestari, sawah labiah dalam. Karano bajak kabau sabagai bajak taradisional diyakini mampu mampatahanan humuih tanah, manjago kualitas padi nan dihasian, dan nan utamo kito indak paralu mancemari lahan jo buangan minyak atau zat lainnyo nan barasa dari masin.
Kamudian dengan malestarian bajak kabau ko, sacaro indak langsuang turuik mampatahanan kaarifan lokal sabagai kakayoan budaya Nagari Batipuah Ateh.
Eksistensi bajak kabau ko di tangah gampuran kamajuan teknologi mampunyoi nilai seni jo estetika katiko dipaduan jo panorama alam pasawahan. Kagiatan ko tantu bisa manjadi atraksi wisata nan manariak paratian urang lua nan sakali -sakali mancaliak. Kagiatan ko salain taranaknyo padek dagiangnyo kagiatan ko bisa manambah pandapatan bagi masyarakaik patani. Ikolah nan ka dicubo untuak dikambangan dek Pamerintah Nagari Batipuah Ateh kamuko nyo.
Salain itu, ado babarapo kiasan, papatah Minang atau samacamnyo nan manjadian bajak sabagai padomannyo. Ado kato kieh nan mangatoan “Lakek pasangan ateh kuduak disandang kayu bajipang, mandanyuik tali katalingo dihelo singka pulang pai”.
Makna sederhananyo adolah jikok baban jo tangguang jawab dilimpahan ka badan diri, apopun kondisinyo baban tasabuik harus dijunjuang dan tangguang jawab harus ditunaian.
Lain pado itu, ado pulo kiehnyo “Dahulu bajak pado kabau” biasonyo kabau nan maelo bajak, kini malah sabaliaknyo tantu ado kalainan. Ikolah realitas nan lah acok tajadi dalam masyarakaik kito akibaik adonyo pageseran nilai dan budayo, parubahan paranan urang tuo sarato mamak dalam mangawasi anak kamanakan. (*)